काठमाडौ – नेपाल कम्युनिस्ट पार्टीको सचिवालय बैठक सकिएलगत्तै नेपाली काँग्रेसका सभापति शेरबहादुर देउवा प्रधानमन्त्री निवास बालुवाटार छिरेका छन् । देउवा बालुवाटार छिर्नुलाई अर्थपूर्ण मानिएको छ ।

नेकपा विवाद समाधान उन्मुख भएपछि देउवा आज बालुवाटार छिरेका हुन् । आजको प्रधानमन्त्री केपी शर्मा ओली, नेकपा अध्यक्ष पुष्पकमल दाहाल प्रचण्ड र काँग्रेस सभापति देउवाको त्रिपक्षीय बैठकमा संवैधानिक आयोगको नियुक्तिलगायत समसामयिक विषयमा छलफल केन्द्रित भएको बुझिएको छ ।

लामो समय देखि संवैधानिक आयोगहरुमा नियुक्ति हुन सकेको छैन । अख्तियार दुरुपयोग अनुसन्धान आयोगलगायत विभिन्न आयोगहरुमा पदहरु खाली छन् । त्यसबारे कुरा मिल्न सकेको छैन । नियुक्तिका लागि ओली, प्रचण्ड र देउवाबीच सहमति बन्नुपर्ने आवश्यकता छ ।

आयोगको नियुक्तिका लागि प्रधानमन्त्री, प्रधानन्यायधीश, सभामुख, राष्ट्रिय सभाका अध्यक्ष, प्रमुख प्रतिपक्षी दलका नेता, उपसभामुखसहितको संवैधानिक परिषदको बैठक बसी अनुमोदन गर्नुपर्ने हुन्छ । कुरा नमिल्दा आयोगमा पदहरु रिक्त छन् ।

तपाईको प्रतिक्रिया

सम्बन्धित समाचार