काठमाडौं । वि.सं. २०७२ सालको भूकम्पबाट पूर्ण रुपमा क्षतिग्रस्त भएको धरहराको लोकतन्त्र दिवसका दिन उद्घाटन हुने भएको छ । पुनर्निर्माण सम्पन्न भएको धरहराको यही वैशख ११ गते अर्थात लोकतन्त्र दिवसको दिन उद्घाटन गरिने भएको हो ।

प्रधानमन्त्री केपी शर्मा ओलीले धरहराको उद्घाटन गर्ने कार्यक्रम राष्ट्रिय पुनर्निर्माण प्राधिकरणले तय गरेको छ । यसअघि आइतबार प्रधानमन्त्री केपी शर्मा ओलीको प्रतिनिधिको रुपमा शिक्षा, विज्ञान तथा प्रविधि मन्त्री कृष्णगोपाल श्रेष्ठले पुनःनिर्मित धरहराको अवलोकन गरेका थिए ।

त्यस क्रममा मन्त्री श्रेष्ठले वैशाख १० गते भित्र धरहरा स्तम्भ भित्र गर्नुपर्ने सम्पूर्ण काम सम्पन्न गर्न निर्देशन समेत दिएका थिए । त्यस अवसरमा प्राधिकरणका प्राविधिक सल्लाहकार राजुमान मानन्धरले धरहरा स्तम्भको मुख्य निर्माण कार्य सम्पन्न भइसकेको जानकारी दिएका थिए ।

फिनिसिङको काम बाँकी रहेको र अबको ५ दिन भित्रमा सबै सम्पन्न भइसक्ने उनले जानकारी दिएका थिए। यतिबेला पुनःनिर्मित धरहरामा रङरोगन गर्ने, बत्ती जडान गर्ने लगायतका काम धमाधम भइरहेका छन ।

२ सय ४५ फिट उचाईको धरहरा स्तम्भको ९८ प्रतिशत काम सम्पन्न भइसकेको छ । धरहरामा धरहरा स्तम्भसँगै कार पार्किङ स्थल, उद्यान, म्युजियम लगायतका संरचनाहरु बन्नेछन् ।

अहिले धरहरा स्तम्भको मात्रै निर्माण सम्पन्न भएको हो । बाँकी काम पनि धमाधम भइरहेका छन । पर्यटकीय स्थलका रुपमा विकास गर्नेगरी निर्माण गरिएको धरहरामा मिन्ट म्युजियम र अर्थ क्वेक म्युजियम पनि रहनेछन् ।

धरहरामा चढ्ने र ओर्लिने गरी दुईतर्फि लिफ्ट रहेका छन । धरहराको २०औं तलामा काठमाडौं उपत्यकाको दृश्यावलोकन गर्नका लागि सिसाले घेरिएको भ्यु डेक बनाइएको छ ।

तपाईको प्रतिक्रिया

सम्बन्धित समाचार