एजेन्सी – युरोपेली च्याम्पियनसिपको साविक विजेता पोर्चुगलका डिफेन्डर जोआओ क्यान्सेलोलाई कोरोना संक्रमण देखिएपछि प्रतियोगिता गुमाउने भएका छन् ।

मंगलबार हंगेरीविरुद्ध खेल्नुअघि गरिएको परिक्षणमा क्यान्सेलोको नतिजा पोजेटिभ आएको हो । प्रशिक्षक फर्नान्डो सान्तोसले उनको स्थानमा गत सिजन एसी मिलानबाट खेलेका डिफेन्डर डिओगो डालोटलाई टोलीमा समेटेका छन् । टोलीका अन्य खेलाडीमा भने कोरोना संक्रमण देखिएको छैन ।

शनिबार गरिएको परिक्षणको नतिजा पोजेटिभ आउने बितिकै क्यान्सेलोलाई आइसोलेसनमा राखिएको छ । उनले अब प्रतियोगितामा सहभागिता जनाउने छैनन् । यस सिजन म्यानचेस्टर सिटीबाट प्रिमियर लिग उपाधि जितेका उनी टोलीको पहिलो रोजाइमा खेल्ने अपेक्षा गरिएको थियो ।

पोर्चुगलले प्रतियोगिताको पहिलो खेलमा मंगलबार हंगेरीको सामना गर्दैछ । बुडापेस्टमा हुने खेलमा पोर्चुगलले डिफेन्समा केहि परिवर्तन गर्नुपर्ने अवस्था आएको छ । पोर्चुगलसँगै जर्मनी र फ्रान्स समेत रहेकाले यस समूहलाई ग्रुप अफ डेथ मानिएको छ ।

तपाईको प्रतिक्रिया

सम्बन्धित समाचार